1. Hulaan Mo
Talinghaga ng isang Job Interview
ni Peter Torres

2. “Bakit ikaw ang dapat naming
piliin para sa posisyon na ito?
Ano ang mga katangiang
mayroon ka na makatutulong
sa kompanya?”

3. Bakit ako?
Lagi akong nariyan kapag
kailangan mo ako! Naniniwala ako
na ako ay angkop para sa
trabahong ito sapagkat kahit kailan
mo ako tawagin ay darating ako.

4. Naiintindihan ko ang importansya
ng oras. Kaya naman ‘pag tinanggap mo
ako, hindi ka magsisisi sapagkat lagi mo
akong maaasahan. Mula sa oras ng
iyong paggising hanggang sa oras ng
iyong pagtulog, maaasahan mo ako.

5. Dapat ay tanggapin mo ako para sa
trabahong ito sapagkat masisigurado kong
hindi sasakit ang ulo mo. Ako ang
empleyado na magpapapanatili ng
kalusugan mo. Kumbaga, kung isang
masarap na tanghalian ang hanap mo,
mabilis na sunggab lang sa akin bago
kumain at siguardong sasarap ang pagkain
mo.

6. Sa dami ng mga taong
nakakasalamuha mo araw-araw,
hindi maiiwasang isiping maari
kang magkasakit. Aba, ako ang
magtatanggal ng kagaw mula sa
katawan mo.

7. Hindi ako ang empleyado na
magbibigay ng mga problema sa iyo.
Dahil masipag ako, hindi mo na
poproblemahin pang magkasakit mula
sa pagod na dulot ng pagtatrabaho.

8. Sa tuwing may mga problema na
kakapit sa iyo, isang tawag lang sa
akin at tutulong ako. Matiyaga kong
tatanggalin ang mga problemang
patuloy na dumidikit sa iyo, kahit
gaano pa ito kahirap ay kakayanin ko.

9. Pagkatapos ng mahabang araw
sa trabaho at uuwi kang pagod, sa
tulong ko ay hihimbing ang gabi mo.
Hindi ka na uuwi na dala ang trabaho
sa isip mo sapagkat sisiguraduhin
kong gagawin ko anumang ihimatong
mo.

10. Malinis ako pagdating sa
aking mga gawain. Sa katunayan,
laging organisado ang aking mga
gamit. Kahit gaano pa kagulo ang
opisina na ito, magagawan ko ng
paraan at tiyak na lilinis ito.

11. Lagi akong maaasahan ng aking
tagapangasiwa at marami na rin akong
naging karanasan sa trabahong ito. Simula
pa lang ng ipinanganak ako, hindi lahat ng
pagsubok na iniharap sa akin ay madaling
masasagot. Ngunit sanay akong
mamaluktot, kaya naman ang bunga ng
aking trabaho ay laging kasing bango ng
bulaklak sa hardin mo.

12. Sisiguraduhin kong hindi ka
magsisisi kapag pinili mo ako. Ako ang
magpapapanatili nang malinis na
imahe ng kompanyang ito. Pati ba
naman kasi sa paghihilamos ay ako
ang tinatawag mo.

13. Ako ay angkop para sa posisyong ito
sapagkat kahit sa iyong pagtitig sa salamin,
ako pa rin ang makikita mo.
Oo, ako ang sabon na nasa iyong harapan.
Ang iyong empleyadong laging nandiyan.